කලාකරුවෙකු වීම අන් සෑම වෘත්තිකයෙකු වීමකට වඩා උසස්ය. මන්ද කලාකරුවා සමස්ථ සමාජයම තම නැණ පමණින් දැක ඊට සංවේදිව එය පෙරළා තම ප්රකාශන මාධ්ය තුළින් සමාජගත කරන බැවිණි. ජයන්ත චන්ද්රසිරි මහතා සුවිශේෂී වන්නේ ඔහු කලාකරුවෙකු වීමත්, ඔහුගේ ප්රකාශන මාධ්ය එක් දෙයකට සීමා නොවීමත් හේතුවෙනි. එමෙන්ම ඔහු අතිශය සංවේදී කලාකරුවෙකු වන බැවිණි. ඔහු වේදිකාව, රූපවාහිනිය, සිනමාව, පුවත්පත්,කවිය, ගීතය සිතැඟි ප්රකාශ කිරීමේ මාධ්යයන් ලෙස භාවිත කරයි. මේ භාවිතය කෙනෙකුට පිහිටන්නේ කලාතුරකිනි. ඔහු වේදිකාවේත්, සිනමාවේත්,රූපවාහිනියේත් සිය නිර්මාණ තුළින් බුද්ධිමත් ප්රේක්ෂකයා සිය ග්රහණයට ගත් නිර්මාණශීලී අධ්යක්ෂකවරයෙකි.
1559 ජුනි 22 දා බණ්ඩාරවෙල මහගම ආරච්චිගේ දයානන්ද හා වලිසිංහ ආරච්චිගේ සෝමලතා කුමාරිහාමිට දාව මෙලොව එළිය දුටු චන්ද්රසිරි මහතා සොහොයුරන් දෙදෙනකු සහ සොහොයුරියන් දෙදෙනකු යුත් පවුලේ වැඩිමලාය. රාගම හීන්කෙන්ද මහා විද්යාලයෙන් ශිල්ප හැදෑරූ මොහු කලා කටයුතු වලට දැක්වූයේ දැඩි ඇල්මකි. ප්රසිද්ධ වේදිකාවේ ඒකාධිපති ලොවින් එකෙක්, සිලිං බිලිං, සත්මුතු කාමරයක් ඇතුළ, සක්විත්තෝ වැනි නාට්ය ගණනාවකටම රංගනයෙන් දායක විය.
1981 දී මල්ටි ෆැක්ස් ආයතනයේ ඉරිදා පුවත්පතේ උප කර්තෘවරයෙකු වශයෙන් සේවයට එක් වි පුවත්පත් කලාවේදියකු ලෙස වෘත්තිය ජීවිතය ආරම්භ කර 1982 දී උපාලි පුවත්පත් සමාගම හා එක්විය. දිවයින පත්රයේ නියෝජ්ය කර්තෘවරයෙකු හා විශේෂාංග කර්තෘවරයකු වශයෙන් ද, වර්තමානයේ කර්තෘවරයෙකු වශයෙන් තම දායකත්වය පිරිණමමින් පුවත්පත් කලාවට අගනා මෙහෙයක් අදත් ඉටු කරයි.
1987 දී අප්පුආරච්චිගේ දෝන මදුමතී හා අතිනතබගත් ජයන්ත චන්ද්රසිරි මහතා උත්තරා අමන්දා, අංජනී සුලක්ඛනා සහ උවදු සඳකැන් යන දරුවන්ගේ ආදරණීය පියාණන්ය.
ජයන්ත චන්ද්රසිරි යන නාමය ශ්රී ලාංකීය කලා සමාජය තුළ කේන්ද්රගත වනුයේ විශිෂ්ටගණයේ ටෙලි නාට්ය නිර්මාපකයෙකු ලෙසය. වෙද හාමිනේ ටෙලි නාට්යෙය් සිට හතර දෙනෙක් සෙන්පතියෝ දක්වා වූ ටෙලි නිර්මාණපෙළින් ඔහු පෑ අභිමන් ඒ බව සාධාරණීකරනය කරයි. එහිදී වෙස් මුහුණ, දඬුබස්නාමානය, කාලාර්ථයේ තීර්ථ යාත්රිකයා, අකාල සන්ධ්යා සහ රැජින යන ටෙලි නාට්ය ගැඹුරු අර්ථයක් කැටි කරගත් ටෙලි නාට්ය ලෙස අගය කළ හැකිය.
එමෙන්ම ගරිල්ලා මාර්කටින්, අග්නිදාහය, සමනළ සංධ්වනිය, මහරජ ගැමුණු යන චිත්රපට ඔහුගේ සමාජ කියැවීමේ හැකියාව මනාව ප්රකට කරයි.
මේ ආකාරයෙන් විශිෂ්ට නිර්මාණකරණයක නියුතු ජයන්ත ජන්ද්රසිරි නම් කලාකරුවාගේ නිර්මාණ කෞෂල්ය සැබෑවටම සුවිශේෂී බව මොනවට පැහැදිලි වෙයි.
